Llaboral Cinemateca ye un espaciu polifacético y abiertu de Llaboral Ciudá de la Cultura (Gijón/Xixón) dedicáu n´esclusiva al cine.
Llaboral Cinemateca, per un llau, quier estimular el conocimientu del arte cinematográficu na so dimensión cultural, xeográfica y histórica y en toles sos facetes y xéneros, col averamientu y la difusión de les sos obres pente medies de programes de proyecciones fílmiques, seminarios, actividaes educatives y otres iniciatives especiales.
Per otru llau, y non menos importante, Llaboral Cinemateca ye tamién un serviciu públicu pal sector creativu cinematográficu y audiovisual asturianu al traviés de La Cinemateca Ambulante (proyecciones en conceyos medianos y pequeños) y Cinemateca Curtios (programación y distribución de curtiumetraxes).
Ente los oxetivos principales de Llaboral Cinemateca atópense estos:
- Programación de proyecciones, actividaes educatives, seminarios y conferencies col fin de formar nel arte cinematográficu y difundilu con criterios d´estratexa cultural al serviciu de tola sociedá asturiana.
- Atracción de públicu nuevo a la cultura cinematográfica y audiovisual.
- Collaboración con otres instituciones y alministraciones de la xeografía asturiana pa la organización conxunta de programación cinematográfica.
- Sofitu a la creación de películes y curtiumetraxes realizaos n´Asturies, amás de la so difusión y promoción en mercaos y festivales.
Llaboral Cinemateca ta promovida pola Conseyería de Cultura, Pollítica Llingüística y Turismu al traviés de la Sociedá Pública de Xestión y Promoción Turística y Cultural del Principáu d´Asturies.