El Centru de Recursos Escénicos del Principáu d’Asturies ye un proyectu con sede na Llaboral que tien como oxetivu sofitar la creación y investigación escénica de los profesionales de la rexón, valiéndose de recursos materiales y humanos del Teatru de la Llaboral pa la concepción, creación y puesta n’escena de la obra.
El Programa de Residencies, con dos convocatories al añu, forma parte de la so actividá. Les compañíes escoyíes pa esti programa reciben una ayuda económica y cada residencia tien una duración máxima de cuatro selmanes; amás, cada compañía tien a la so disposición un responsable técnicu del equipu del Teatru de la Llaboral pa da-y soporte nel periodu de residencia, y personal auxiliar pa cargar, descargar y mover escenografíes o material.
Amás, Llaboral Ciudá de la Cultura collabora con profesionales de la cultura y el trabayu artísticu cediendo temporalmente los espacios escénicos del Teatru, del Paraninfu, de les sales d’ensayos (Sala Azul, Sala Mariella y Sala Naranxa) y del platO de Llaboral Centru d’Arte coles sos dotaciones técniques respectives pal desenvolvimientu de proyectos artísticos de toa mena.