Les Hermanes Clarises encargábense de les Cocines y Llavandería pa dar serviciu a los residentes de lo que yera la Universidá Llaboral hasta 1996. Con entrada pela Torre, destaca nesti espaciu, que caltuvo la so estructura intacta, la so gran chimenea central y los ventanales que dexen pasar lluz natural abondo.
Asitiada nel segundu pisu del Teatru, ye conocida polos frescos d’Enrique Segura que decoren les sos paredes y que reflexen d’una forma alegórica la historia de la fundación de la Universidá Llaboral, convirtiendo esti espaciu nun recintu solemne realmente singular
Con forma de proba de barcu y solución vanguardista, los arquitectos Manuel López-Mateos y Mari-Juana Ontañón diseñaron el Paraninfu, al que se llega al traviés d’una escalera de caracol dende la Cafetería.
Con 150 metros de llargor por 50 metros d’anchor, pavimentada con lloses de granitu, arrodiada de portalaes y cola Ilesia como elementu central, ye’l corazón de la Llaboral. Pal so diseñu Luis Moya inspiróse principalmente na plaza de San Marcos de Venecia
La Ilesia de la Llaboral, tan imponente, ye, dende’l puntu de vista arquitectónicu, una pieza d’interés singular con una planta elíptica con más de 800 metros cuadraos. La so cúpula diseñóse garrando’l modelu de la ilesia de Santa Sofía de Constantinopla, n’Istambul, modificando’l so diseñu pa reflexar equí la cúpula elíptica más grande d’Europa.
Quiciabes l’edificiu más característicu de la Llaboral, yá que val pa identificar a la Ciudá de la Cultura a la primer vista. Con aproximao 130 metros d’altor, na planta 17 asítiase’l Mirador, dende onde s’acolumbra una vista estraordinaria del complexu y del paisaxe qu’arrodia l’edificiu.
Concebíu de mano como un gran salón d’actos de la Universidá Llaboral vieya, el recintu convirtióse nel primer teatru de titularidá autonómica de la comunidá y nún de los meyores del norte d’España no que se refier a espacios, capacidá y tecnoloxía. El Teatru de la Llaboral cunta con más de 1.300 localidaes repartíes na sala principal, los palcos y l’anfiteatru y con sales d’ensayu, xuntes y congresos.
Sitiu de paséu y de descansu pa visitantes, d’una superficie de 12.578 metros cuadraos. La rehabilitación de los Xardinos dexó recuperar la idea primera cola que se concibieron nel so día por Javier de Winthuyssen, con dos fileres d’aguañales d’estilu andalucista. El proyectu de rehabilitación, diseñáu pol arquitectu Alfonso Toribio Gutiérrez y el paisaxista José Valdeón, dexó recuperar l’agua de les canales con un sistema hidráulicu concebíu p’aprovechar esti recursu al máximu.
La Biblioteca de la Facultá de Comerciu, Turismu y Ciencies Sociales «Xovellanos» ye un espaciu abovedáu que sigue’l proyectu orixinal de Luis Moya y que ta decoráu colos murales de Juan Méjica.