CIFP La Laboral
La formación profesional, que marcó la vida del edificiu dende mediaos del sieglu XX, sigue presente na nueva ciudá de la cultura per aciu’l Centru Integráu de Formación Profesional, de referencia nes families profesionales de Fabricación Mecánica y Madera y Mueble.
Tres les obres de rehabilitación realizaes, el CIFP La Llaboral ocupa una superficie de más de 22.000 m2, pa dar serviciu al alumnáu de les families profesionales d'Alministración y Finances, Actividaes Físico Deportives, Comerciu y Marketing, Informática, Caltenimientu y Servicios a la Producción y Química, amás de les de referencia.
Nel centru imparten los trés subsistemes de Formación Profesional: reglada, ocupacional y continua. Más de 1.000 alumnos estudien cada añu nel CIFP, siguiendo asina la tradición de Formación Profesional d'escelencia de la Llaboral.
Conservatoriu Profesional de Música y Danza
El Conservatoriu Profesional de Música y Danza de Xixón foi la última pieza n'incorporase a la ufierta educativa de la Llaboral. Anexu a la Escuela Superior d'Arte Dramático, ocupa parte de les antigües dependencies de la residencia d'estudiantes.
Les instalaciones del Conservatoriu disponen de más de sesenta aules y 5.600 m2 distribuyíos en baxu y cinco plantes, con capacidá p'atender ente 500 y 800 alumnos de los graos elemental y mediu.
El nuevu Conservatoriu dispón amás de trés sales destinaes a la celebración de conciertos.
Escuela Superior d'Arte Dramático
La Escuela Superior d'Arte Dramático del Principáu d´Asturies (ESAD Asturies) ocupa 5.000 metros cuadraos del edificiu, anexos al Teatru y d'estraordinaria riqueza arquitectónica, na que destaca una magnífica muestrade los azulexos de Talavera que decoren munchos de los pasiellos de la Llaboral.
Na ESAD Asturies estudien 100 alumnos que participen de forma activa na vida cultural y artística de la Ciudá de la Cultura.
Espaciu de Xixón Impulsa – Conceyu de Xixón
Destináu a establecer oficines pa empreses científiques y/o tecnolóxiques y con aules formatives pa la reconversión de perfiles profesionales hacia les demandes de la economía actual.
Llaboral Casa Xoven
La rehabilitación de la Residencia Norte de la Llaboral, que conforma un edificiu en forma de “U”, permitió la construcción de 102 viviendes de promoción pública pal arriendu, con espacios y servicios comunes como sales d'estudios o una sala xuntes polivante.
Llaboral Casa Xoven, conocida polo común como los “minipisos” de la Llaboral, ta xestionada pola empresa pública Vipasa.
LLABoral Centru d'Arte y Creación Industrial
LLABoral Centru d’Arte y Creación Industrial ye un espaciu multidisciplinar que favorez l'intercambiu artísticu y fomenta la rellación ente sociedá, arte, ciencia, tecnoloxía ya industries creatives. Ye un proyectu abiertu y dinámicu, dirixíu a tolos públicos, nel que conviven les espresiones artístiques más actuales con actividaes educatives y formatives.
Inauguróse'l 30 de marzu de 2007 y representa un nuevu modelu de centru d'arte que tien como soporte esencial na so programación la propuesta d'estratexes de participación y diálogu na intersección mesma del arte y la creación industrial.
Radiotelevisión del Principáu
L'antiguu conventu de les clarises ye agora la sede de la Radiotelevisión del Principáu d'Asturies (RTPA), ente públicu de comunicación del Principáu que dispón de televisión, radio y portal de noticies.
SERPA
Nel edificiu allugáu ente la Cafetería y la Torre alcuéntrase la Sociedá de Servicios del Principáu d'Asturies (SERPA, S.A.), empresa pública qu'actúa como mediu propiu instrumental y serviciu técnicu de l'Alministración del Principáu d'Asturies.
SERPA realiza actividaes de desarrollu rural, d'interés agrariu, d’acuicultura y pesca marítima, d'interés medioambiental, turísticu, docente, cultural y deportivu.
Sociedad Turística y Cultural Principado
La Sociedá Pública de Xestión y Promoción Turística y Cultural del Principáu ye la encargada de xestionar equipamientos de mena cultural, turística y deportiva d’Asturies, ente ellos Llaboral Ciudá de la Cultura, y de diseñar, coordinar y desenvolver les acciones de promoción y comercialización turística de la rexón. Dispón d’oficines asitiaes al llau del Teatru, nel edificiu norte de la Plaza central, y na entrada Principal de la Llaboral, con accesu dende’l Patiu Corintiu.
Web Sociedad Turística y Cultural del Principáu
TK Elevator
TK Elevator cuenta na Ciudá de la Cultura con Oficines d'I+D+i y un Llaboratoriu de Prototipos a escala real.
Les Oficines d'I+D+i alcuéntrense nel edificiu norte de la Plaza central, nun espaciu remozáu ente'l Teatru y la zona destinada a alministración del Principáu.
Amás, la multinacional alemana dispón d'un nuevu edificiu allugáu na parte posterior del ala norte, tres la Caxa Escénica del Teatru y el Conservatoriu, onde s'atopa'l Llaboratoriu de Prototipos a escala real, un centru mundial pa l’anovación dedicáu principalmente al desarrollu d'escaleres mecániques, pasiellos rodantes y pasareles d'embarque de pasaxeros p'aviones.
Universidá d'Uviéu
La Facultá de Comerciu, Turismu y Ciencies Sociales "Jovellanos", de la Universidá d'Uviéu, tien na Ciudá de la Cultura un espaciu de más de 18.000 metros cuadraos d'instalaciones, aules y despachos. Equí impártense, ente otros estudios, les Diplomaturas en Ciencies Empresariales, Turismu y Xestión y Alministración Pública, según los Graos en Comerciu y Marketing, Turismu, Xestión y Alministración Pública y Trabayu Social Cerca de 1.500 mozos estudien nesta sede universitaria. A ellos hai que sumar los estudiantes de la Escuela Universitaria de Trabayu Social, tamién allugada nesti espaciu de la Llaboral.
Web Facultá de Comerciu, Turismu y Ciencies Sociales "Jovellanos"
