Axenda - Laboral Ciudad de la Cultura

47 Selmana de les Lletres Asturianes

Duces suaños ye una creación escénica alredor de la figura real de Taresa Cónsul, monxa benedictina del sieglu XVIII y una de les voces femenines más destacaes de la ilustración asturiana. 

Esta muyer, dende’l Monasteriu de la Vega n’Uviéu cultivó la escritura dramatúrxica nun tiempu nel que les muyeres teníen vetáu l’accesu a munchos espacios de conocencia y pasa a la historia de la lliteratura n’asturianu como la primer dramaturga de la que tenemos noticia.

El espectáculu propón un monólogu de ficción nel que Sor Taresa escribe una carta a la so hermana enferma, Xertrudis. Esa carta conviértese nun viaxe emocional que trespasa les muries del conventu: una reflexión sobre la renuncia, la familia, la comunidá, la identidá y la lluz íntima que sostién a quien vive en silenciu. El testu afonda na vida interior d’una muyer consagrada a la clausura, pero tamién a la so memoria, a los sos miedos, y a la presión del deber, al empar que dexa ver la esperanza y el poder sanador de la escritura, la música y la fe compartida, que se manifiesten como fuercies d’unión y sofitu d’una comunidá de muyeres que caminen xuntes.

Duces suaños entemez teatru, música coral y una atmósfera inspirada na vida conventual del sieglu XVIII, creando un diálogu ente la historia y la emoción contemporánea y un espaciu onde’l públicu entra nel ritmu pausáu y fondamente humanu de la vida nos conventos. 

Sobro´l escenariu, Sor Taresa ta arropada por un coro de novicies, qu’acompaña, comenta y abraza musicalmente la so voz, convirtiéndose nun elementu esencial de la dramaturxia y del viaxe emocional del espectáculu. Amás, el coru plantega una sorprendente fusión musical que trespasa fronteres estétiques y temporales: Eurythmics, David Bowie o Mercedes Sosa conviven cola sonoridá conventual, creando un paisaxe sonoru inesperáu y emocionante. 

Una propuesta que xenera un contraste deliberáu ente la clausura del sieglu XVIII y la potencia emocional de la música contemporánea, dando llugar a un universu escénicu únicu.

Sobro l'escenariu: 

• Cris Puertas.
• Coru de les Novicies de la Orde de la Cuarta Pregunta (Asturies Gospel Experience).
• Pianista: Sonia Cartón.

Dirección musical y arreglos: Mapi Quintana. 

Dirección d'escena: Laura Iglesia.

Asistencia técnica: Carlos Dávila.

Ayudante de producción: Marta Allende. 

Entrada llibre hasta enllenar l’aforu.