La Cueva de Cueves ye un espaciu pa descubrir na penumbra la maxa de les pintures nel marcu natural, col mesmu ambiente nel que s´atopen les pintures y grabaos orixinales.
Trátase d´un recintu soterrañu que recrea de mou fiel el mundu emotivu y sensorial del interior de les cavernes.
Nél, espónense les reproducciones a escala real de trés significativos conxuntos del arte rupestre paleolíticu européu:
La Sala de los Polícromos de La Cueva d’El Pozu’l Ramu (Asturies)
Represéntase la Sala de los Polícromos, asina nomada pol usu de dellos colores: encarnaos y negros (con derivaciones en moraos). A esta variedá súmense tamién les dos técniques utilizaes: la pintura y el grabáu, esta última usada pa señalar dellos contornos y tamién pa detallar y destacar los güeyos y les coles.
L´animal más representáu ye´l caballu, nesti casu del tipu Tarpán, un tipu de caballu qu´esistía nesta rexón nuna dómina de glaciación na que´l clima se movía ente los 0 y 5 graos. Destaca, amás, la imaxe de dellos renos con pelame nel pescuezu y tamién s´atopen representaos dellos signos (el que más destaca ye unu grabáu cuadrangular en forma de parrilla).
La Sala de los Polícromos ye unu de los meyores exemplos de superposición y usu reiteráu y intencional del espaciu del arte rupestre européu. Nel mesmu panel recuéyense representaciones que daten de fai 23.000 años hasta les sos últimes fases de 13.000 años.
Panel n.u 4 del Salón Negru de la cueva de Niaux (Francia)
La base de la piedra nun ta coloriada y la gama pa les figures ye restrinxida: negru y daqué d´encarnáu pa dalgunos de los signos.
L´animal que predomina ye´l bisonte, representáu na parte cimera del panel. El bisonte que destaca na parte central esquierda aveza catalogase como fema poles formes que presenta, como la xoroba poco pronunciada. En contraste y afrontando a esti atoparíase´l machu de la derecha, que presenta una xoroba más pronunciada.
Na parte inferior de la paré muéstrense dellos caballos que col pelo pintáu representen a un tipu d´équidos con gran cantidá de pelo, los Przewalski. Completen el bestiario dos cabres, una representada de manera mui naturalista y l´otra totalmente esquemática.
La datación del panel ye de 13.000 años d´antigüedá.
El Camarín de la Cueva de Candamu (Asturies)
La de San Román de Candamo ye la cueva con pintures del Paleolíticu Superior que s´atopa asitiada nel estremu más occidental de la Península Ibérica.
La palabra camarín vien de cámara, y consiste nuna oquedá que, a resultes del so allugamientu na cueva, supón en sí mesma un santuariu. Atópase nun llugar de difícil accesu a 12 metros del suelu, un magníficu exemplu d´allugamientu pensáu y escoyíu que da idea non yá de la importancia que daben a les formaciones xeolóxiques sinón tamién a la illuminación.
Nel centru de la composición apaez la figura d´un caballu de color siena y d´estilu solutrense y otros trés équidos d´execución incompleta, arriendes d´un uro, animal estinguíu nel s. XVII y antecesor del toru.
Les pintures del Camarín fueron dataes en 21.000 años. Nun son les úniques pintures qu´apaecen na cueva anque sí son les que meyor se caltienen. Ye de destacar que dende´l branu de 2008 la cueva de Candamo y la de Tito Bustillo y otres trés cueves asturianes (Llonín, Pindal y Covaciella) declaráronse monumentu de la humanidá pola UNESCO, lo que supón una puesta en valor de la importancia d'stes representaciones singulares y irrepetibles, qu´anque en munchos casos tean cerraes al públicu xeneral, pueden almirase y esfrutase en répliques esactes como les que s´amuesen nel Parque de la Prehistoria de Teberga.
Contactu